هو ايه حكايته بالظبط ؟؟

من جديد -عزيزى- نتحدث عن الشىء وضده .. أو عن الأمور المتناقضة بشكل عام .. اليوم ..أضعت ساعة من ساعات عُمرى أقرأ تعليقات بعض زملاء المدرسة على صورة فتاة -زميلة مدرسة هى الأخرى- كانت ترتدى الحجاب ثم خلعته .. تظهر فيها الفتاة بخصلات شعرها المسترسلة .. الكثيرات أغمضن عيونهن عن الحقيقة واكتفيَنّ بـ (نايس بيك بايبى) و (فاجرة ..شكلك تحفة) .. واحدة أو اثنتان تجرأتا وافتتحتا مناقشة طويلة .. مثلًا (ر) تقول -بالفرانكو طبعًا لكننى سأترجم بقدر استطاعتى - : "ايه ده قلعتى الحجاب ؟؟ .. حلوة أوى وشكلك حلو بشعرك .بس كان أحلى بالحجاب ..!! " 
والكثير من القبلات :* :* والقلوب الوردية والوجوه ذات الإبتسامات الواسعة D: .. تبًا لهم من متناقضين .. 
تعتبرها الفتاة صاحبة الصورة -ولتكن (س) - إهانة بشكل ما .. فتبدأ فى إلقاء محاضرة عصماء عن : "كل واحد حر ". ."ربنا أدرى بعبيده " .."يا ريت كل واحد يخليه فى نفسه" .. "ربنا هو اللى بيحاسب " ..
اكتفت (ر) بـ " ربنا يرجعك لعقلك وتلبسى الحجاب تانى"
إهانة أخرى ..إهانة أخرى .. 
"معنى كده إنى ناقصة عقل يعنى ؟؟"
ثم يتحول الأمر إلى صراع ديكة حين تتدخل صديقات (س) .. وكأنهن فرقة الدعم أو الـ(باك آب) ..الواجب يحتم عليهن التدخل ونجدة صديقة فى حاجة إلى النجدة ..
(م) تقول : " ايه ده ايه ده يا (ر) .. يا ريت كل واحد يخليه فى نفسه بقى .. واللى عنده كلمتين محشورين فى ظوره ..يا ريت يسيطر عليهم .. يا جماعة وحياة أبوكوا كل واحد يخليه فى نفسه بقى ..عاجبك مش عاجبك ده رأيك ..ماحدش عارف اللى فيها ..مش هانعمل شيوخ كلنا " 
وتستمر المناقشة الحادة بعد أن أتى الدعم .. يتراجع موقف (ر) قليلًا .. ثم تأتى قوات الحياديين .. الحياديون هم مَن يكرهون عدم التدخل .. هم يعشقون رؤية أسمائهم على الكومنتات على ما يبدو .. لكنهم لا يبغون حروبًا ..لا يسعون وراء المتاعب مع الآخرين ..(مش عايزين يزعلوا حد ) بمعنى أصح ..فقط يضعون بصمتهم ويولون الأدبار خارجين فى صمت ..
تقول (ن) فى ثقة :(س) حبيبتى ..انتى زى القمر ما شاء الله ..مادام مش أد مسئوليته وإنك تحافظى عليه ..يبقى كده أحسن ..لأن الحجاب محتاج خطوات كتير وأكيد كلنا كـ(محجبين) -كتبتها كذلك ولا مزاح هنالك- مش عاملين بيها ..ولا بنحافظ عليه ..وأنا واحدة منهم ..ويا رب المرة اللى جاية يكون عن إقتناع أفضل ..وربنا يتقبل منك ،انتى عسل وأنا باحبك .. "
ثم لابد من توجيه كلمة عتاب وتقريع لهؤلاء -أمثال (ر) - ممن سولت لهم أنفسهم بقول يمس وترًا حساسًا :
"مش هانحاسب بعض يا جماعة .ربنا مسئول عن عبيده ..مش هانمسك فى غلطات الناس ونسيب غلطاتنا ..بلا بلا بلا بلا بلا ...."
صديقات (س) يبدأن جَلسة (شماتة) لطيفة حول نيران المعسكر ..(م) تقول : "يا عينى ع البت -تقصد (ر) - ..تلاقيها اتفحمت خالص .. والله صعبانة عليا " 
..تفاجأهن (ر) كالغول الذى ظنه الفارس ميتًا .. وتقول ما معناه : "أنا لسة عايشة نياهاهاهاههاا "
ويبدأن فى سلسلة من التعليقات المتناقضة المتناقضة المتناقضة ..حتى أن أى مدون ملتزم بأسبوع التدوين عن (الشىء وضده) كان ليجد كنزًا ثمينًا فى كل تلك التعليقات .. 
(ر) تُرفق كلامها بالكثير من الوجوه الضاحكة والإبتسامات .. :
"ههههههههههههههههههههه ..انتوا واخدين الموضوع على أعصابكوا أوى كده ليه (وجه ضاحك) .. أنا قلتلك مبروك وشكلك بالحجاب أحلى (قُبلة) ..انتوا كده يعنى جدعان وبتاع ؟؟ -تقصد صديقات (س)- .. ايه الجو ده ؟؟ ..يا ستى براحتك أنا كلمتك (قلب وردى) ..ايه الناس دى (وجه يضحك ملأ فمه وعيناه مغمضتاه من الضحك XD ) ..
انت ايه رأيك ؟؟ .. هو الموضوع مش ناقص آراء ..الآراء بدأت تنسال من جوانب الجَرّة من كثرتها .. المهم .. مسلى أوى التناقض ده .. بس مرعب ..مرعب !!